Svar

Leiðtogaráðið (European Council) er skipað leiðtogum aðildarríkjanna, yfirleitt forsætisráðherrum en til dæmis er Frakklandsforseti fulltrúi landsins í ráðinu. Einnig situr í ráðinu sérstakur forseti sem undirbýr fundi þess, stýrir þeim og kemur fram í nafni ráðsins. Ráðið heldur fundi allt að fjórum sinnum á ári ásamt forseta framkvæmdastjórnar. Það mótar stefnu sambandsins og tekur ákvarðanir í stærstu málum. Það hefur verið að eflast að undanförnu, meðal annars til móts við umræðuna um lýðræðishalla.

Ráðherraráðið (Council of the European Union, áður kallað Council of Ministers) er stofnun þar sem ráðherrar ESB koma saman en hins vegar fer eftir viðfangsefnum hvaða ráðherra koma frá hverju landi. Þegar leiðtogar aðildarríkjanna koma saman nefnist það leiðtogaráð.

Evrópuþingið (European Parliament, EP) er eina stofnunin í ESB sem er kosin í beinni kosningu. Þingið fer í vaxandi mæli með löggjafarvald og deilir valdi til dæmis með ráðherraráðinu.

Framkvæmdastjórn ESB (European Commission) er ein helsta stofnun bandalagsins. Hún gætir hagsmuna sambandsins sem heildar, gerir drög að nýrri löggjöf, stýrir daglegri framkvæmd á stefnu sambandsins og ráðstöfun á fjármunum. Í henni á nú sæti einn fulltrúi hvers aðildarlands, hver með sitt verksvið svipað og í ríkisstjórnum, en starfsmenn hennar eru embættismenn. Hún hefur oft verið ein umdeildasta stofnun ESB.

Evrópudómstóllinn (Court of Justice of the European Union, CJEU, áður kallaður European Court of Justice, ECJ) er æðsta dómsvald ESB og hefur aðsetur í Lúxemborg. Hefur oft kveðið upp úrskurði um grundvallaratriði í starfi sambandsins og þannig haft mikil áhrif á þróun þess.

Seðlabanki Evrópu (European Central Bank, ECB) var stofnaður með Maastricht-sáttmálanum árið 1998. Hlutverk bankans er að hafa umsjón með stjórn peningamála í þeim 17 aðildarríkjum ESB sem nota evruna. Núverandi bankastjóri er Mario Draghi og er bankinn með höfuðstöðvar í Frankfurt í Þýskalandi.