Svar

TARGET2 (e. Trans-European Automated Real-time Gross Settlement Express Transfer system; stórgreiðslukerfi Seðlabanka Evrópu, önnur útgáfa) er millifærslukerfi seðlabanka evrulandanna við Seðlabanka Evrópu og þar með undirstaða evrusamstarfsins. Það er í gegnum TARGET2-kerfið sem fjármagn er fært á milli viðskiptabanka yfir landamæri evrulanda með milligöngu seðlabanka viðkomandi landa.

TARGET2 er miðlægt kerfi, rekið sameiginlega af seðlabönkum Ítalíu, Þýskalands og Frakklands. TARGET2 var innleitt árið 2007 í stað upprunalega TARGET-kerfis Seðlabanka Evrópu, sem var gangsett með evrunni í janúar 1999. TARGET2 styður við peningastjórn Seðlabanka Evrópu í evrum og þjónar fjármálafyrirtækjum með uppgjör í evrum. Kerfið starfar sem stórgreiðslukerfi fyrir 23 seðlabanka auk Seðlabanka Evrópu og gerir upp viðskipti þeirra fjármálastofnana sem seðlabankarnir þjóna.

Einfaldast er að lýsa því hvernig kerfið virkar með því að taka dæmi: Írskur bóndi kaupir traktor af þýsku fyrirtæki. Írski bóndinn áframsendir greiðsluna fyrir traktorinn í gegnum sinn írska viðskiptabanka, írska seðlabankann, þýska seðlabankann og þýskan viðskiptabanka til þýska framleiðandans.

Bláu örvarnar tákna færslur og gulu örvarnar tákna kröfur. Smellið á myndina til að stækka hana.

Á yfirborðinu eiga sér stað skipti, írski bóndinn fær traktorinn sinn og þýski framleiðandinn fær greitt fyrir hann inn á reikninginn sinn í sínum viðskiptabanka. Á bak við tjöldin hefur þó ekki komið til neinna raunverulegra flutninga á fjármunum. Á reikning írska seðlabankans hjá Seðlabanka Evrópu færist skuld og á móti eignast þýski seðlabankinn kröfu á hendur Seðlabanka Evrópu.

Við eðlilegar aðstæður jafnast skuldir og kröfur einstakra seðlabanka við Seðlabanka Evrópu nokkurn veginn út yfir daginn þar sem hver og einn seðlabanki hefur jafnt milligöngu um að færa fé til og frá því ríki sem hann er fulltrúi fyrir. Írar kaupa til að mynda ekki einungis vörur frá öðrum löndum heldur selja þeir einnig vörur og þjónustu úr landi og fá fyrir það greitt. Það sama gildir einnig um önnur evruríki.

TARGET staða seðlabankanna við Seðlabanka Evrópu er ekki gerð upp í lok dags eða á öðrum tímapunkti þar sem kerfið er hugsað til óskilgreinds tíma. Við óeðlilegar aðstæður getur því myndast ójafnvægi í kerfinu, til að mynda ef kemur til fjármagnsflótta úr einu evruríki í önnur. Skuldastaða seðlabanka þess ríkis sem fjármagnið flýr úr eykst þá við Seðlabanka Evrópu og kröfur seðlabanka þeirra ríkja sem fjármagnið flýr til, á hendur Seðlabanka Evrópu, aukast að sama skapi.

Sjá frekari upplýsingar á heimasíðu Seðlabanka Evrópu.