Svar

Stofnun ESB í öryggisfræðum (e. European Union Institute for Security Studies, EUISS) var komið á fót árið 2002. Hún er sjálfstæð stofnun Evrópusambandsins og starfar undir sameiginlegri stefnu ESB í utanríkis- og öryggismálum.

Meginhlutverk stofnunarinnar er að greina álitaefni í utanríkis-, öryggis- og varnarmálum sem nýtast í mótun stefnu ESB á þessu sviði. Til að ná settu markmiði stundar stofnunin fræðilegar rannsóknir og skapar vettvang fyrir umræður með skipulagningu málþinga.

Stofnun ESB í öryggisfræðum er stjórnað af sérstakri stjórn. Æðsti fulltrúi sambandsins í utanríkis- og öryggismálum fer með formennsku. Þegar þetta er skrifað í ársbyrjun 2014 gegnir Catherine Ashton því embætti. Stjórnin ákveður fjárútlát og stjórnsýslureglur stofnunarinnar og fer yfir störf hennar.

Höfuðstöðvar stofnunar ESB í öryggisfræðum eru í París. Núverandi forstöðumaður stofnunarinnar er Antonio Missiroli frá Ítalíu.