Svar

Framkvæmdastjórnin (e. Executive Board) er skipuð forseta Seðlabanka Evrópu, varaforseta og fjórum stjórnarmönnum til viðbótar. Meðlimir framkvæmdastjórnarinnar eru skipaðir úr hópi einstaklinga sem hafa faglega þekkingu og reynslu í peninga- og bankamálum. Ráð ESB skipar í framkvæmdastjórnina eftir að hafa ráðfært sig við Evrópuþingið og bankaráð Seðlabanka Evrópu.

Framkvæmdastjórnin skipuleggur meðal annars fundi bankaráðsins og stjórnar daglegum rekstri Seðlabanka Evrópu. Hún framkvæmir sameiginlegu peningamálastefnuna, í samræmi við ákvarðanir sem teknar eru á fundum bankaráðsins, og veitir seðlabönkum evruríkjanna leiðbeinandi fyrirmæli til að framfylgja þeirri stefnu.

Framkvæmdastjórnin fundar venjulega einu sinni í viku. Hún þarf einnig að geta komið saman með skömmum fyrirvara í neyð.