Svar

Eftir því sem Evrópuvefurinn kemst næst eru engar evrópskar reglur til sem kveða á um að í Evrópusambandinu sé borgurum óheimilt að rækta grænmeti í görðum sínum. Engar heimildir er heldur að finna fyrir því að þessu hafi nokkurs staðar verið haldið fram, en eins og komið hefur fram í öðrum svörum á Evrópuvefnum er ekki alltaf samræmi á milli þess sem reglur kveða á um í raun og þess sem sums staðar er haldið fram að þær kveði á um.

Sem dæmi má nefna svörin við spurningunum:

• Er rétt að til sé ESB-reglugerð um hve bognir bananar og gúrkur eigi að vera?
• Er það rétt að Evrópusambandið banni börnum að leika sér með segulstál, leikfangavaraliti, partýflautur og blöðrur?
• Er rétt að vegna ESB-reglna megi ég aðeins fara með tvö börn á aldrinum 5 til 7 ára í sund?

Í bænum Drummondville í Québec í Kanada ku það vera skylda að garðar fyrir framan hús séu minnst 30% gras.

Leit í víðáttum Netsins að upplýsingum um bann við grænmetisræktun er þó ekki alveg árangurslaus. Þar má meðal annars finna fréttir af hjónum í bæ einum í Québec í Kanada sem bæjaryfirvöld hafa bannað að leggja allan garðinn fyrir framan hús sitt undir grænmetisræktun. Þá eru einnig sagðar fréttir af banni við notkun mós við garðyrkju á Englandi og garðslöngubanni í suður- og austurhluta Englands, að ógleymdri fréttinni af því að bannað sé að nota kaffi til að drepa snigla í Evrópusambandinu. En Evrópuvefurinn hefur þegar svarað því hvort sú frétt eigi við rök að styðjast.

Hafi lesendur einhvers staðar rekist á fréttir af því að í Evrópusambandinu sé íbúum óheimilt að rækta grænmeti í bakgörðum eða gróðurhúsum á lóðum sínum eru þeir vinsamlegst beðnir um að skilja eftir athugasemd með tengli hér að neðan.

Mynd:

• EDRA - City of Drummondville, Quebec Says "Rip Out This Garden". (Sótt 8.11.2012).