Svar

Þann 19. febrúar stendur Félag viðskiptafræðinga og hagfræðinga fyrir hádegisverðarfundi um skuldavanda Evrópuríkja og framtíð evrunnar.

Í tilkynningu segir að frummælandi verði Peter Bekx, yfirmaður alþjóðlegra efnahags- og fjármála hjá framkvæmdastjórn Evrópusambandsins og lykilmaður í mótun viðbragða ESB vegna skuldavanda evruríkjanna. Hann mun meðal annars fjalla um breytingarnar á hagstjórn evrusvæðisins frá 2009, stöðuna í dag og hvernig hún gæti orðið eftir tvö ár með tilliti til stöðugleika og trúverðugleika evrunnar.

Gylfi Magnússon, dósent við Háskóla Íslands, tekur þátt í pallborðsumræðum en fundarstjóri verður Sigríður Mogensen, hagfræðingur. Fundurinn fer fram í Sunnusal Hótels Sögu þriðjudaginn 19. febrúar og hefst klukkan 12.

Nánari upplýsingar um fundinn, skráningu og verð, má finna á heimasíðu Félags viðskipta- og hagfræðinga.